Bókaklúbburinn

Síðasti hittingur bókaklúbbsins fyrir sumarfrí verður fimmtudaginn 28. maí kl. 17.
Við munum spjalla saman um Sumarbókina eftir Tove Jansson.

Það verður heitt á könnunni að vanda og öll velkomin. Eintök af bókinni má nálgast í afgreiðslu bókasafnsins.

Um bókina:

Í miðjan hrygginn hafði forstjórinn látið stinga niður stóru skilti með svörtum bókstöfum: Einkalóð. Landganga óheimil. Við förum í land, sagði amman, og var mjög reið. Það kom óttasvipur á Soffíu. Sjáðu nú til, útskýrði amman. Engin sæmilega uppalin manneskja gengur á land í eyju sem aðrir eiga þegar þeir eru ekki heima. En ef þeir setja upp svona skilti þá gerir maður það, því það er hrein ögrun. Auðvitað, sagði Soffía og bætti við mikilvæga þekkingu sína á lífinu.

Sumarbókin er sígild bókmenntaperla sem segir frá Soffíu litlu og ömmu hennar og sumardvöl þeirra á smáeyju undan strönd Finnlands. Þessi tæra og látlausa en djúpvitra frásögn af örheimi eyjunnar, af gróðrinum og dýralífinu, hafinu og veðrinu og heimspekilegum samræðum ömmu og Soffíu hefur heillað lesendur í næstum hálfa öld.

Tove Jansson skrifaði tíu bækur fyrir fullorðna sem allar hafa staðið í skugganum af geysivinsælum sögum hennar um múmínálfana. Sumarbókin er byggð á sumardvölum hennar og fjölskyldu hennar í finnska skerjagarðinum. Hún kemur nú í fyrsta sinn út á íslensku, í afbragðsþýðingu Ísaks Harðarsonar.