Leshringur

Leshringurinn hittist á bókasafninu síðasta fimmtudag hvers mánaðar 
kl. 17-18 yfir vetrarmánuðina.

Í hverjum mánuði er lesin ein bók sem svo er fjallað um á næsta fundi. Öll eru velkomin að vera með í leshringnum og þeim sem hafa áhuga á að lesa bók mánaðarins er bent á að koma við í afgreiðslu bókasafnsins og fá hjá okkur eintak af bókinni. 

Næsti fundur leshringsins verður haldinn fimmtudaginn 30. maí. Þá verður fjallað um skáldsöguna Inngangur að efnafræði eftir Bonnie Garmus (og engar áhyggjur - bókin fjallar ekki um efnafræði!). 

Það verður heitt á könnunni að vanda og öll velkomin. Eintök af bókinni má nálgast í afgreiðslu bókasafnsins. 

Um bókina:

Efnafræðingurinn Elizabeth Zott er svo sannarlega engin venjuleg kona og þegar hún ræður sig í starf á rannsóknarstofnun í Kaliforníu á sjöunda áratugnum þarf hún að takast á við alls kyns fordóma og berjast með kjafti og klóm fyrir viðurkenningu í karlaheimi. Hún ávinnur sér þó aðdáun og virðingu eins manns, ungs snillings sem er talinn líklegur til að vinna Nóbelsverðlaun – og ástin sameinar þau gegn öllum.

En ekki fer allt eins og ætlað er og fáeinum árum seinna er Elizabeth einstæð móðir sem stýrir vinsælasta matarsjónvarpsþætti Bandaríkjanna – þvert gegn vilja sínum – og gerir það á sinn einstaka hátt. Og það kemur við kaunin á ýmsum því að Elizabeth er ekki bara að kenna konum að elda samkvæmt lögmálum efnafræðinnar, hún hvetur þær til að breyta lífi sínu.